Siyaasiga Cali Maxamed Warancade horayna u soo qabtay xilka wasiirka
gaadiidka, cirka iyo dhulka ee maamulka Somaliland ayaa uga digay
xukuumadda Somaliland dhalan rogis uu sheegay inuu Madaxweynaha
Soomaaliya Sheekh Shariif ku sameeyay wadahadaladii Somaliland iyo
Soomaaliya .
Mr. Warancade ayaa warmurtiyeed uu shalay soo saaray wuxuu ku sheegay
in Sheekh Shariif dunida ku faafinayo in nuxurkii wadahadalada
Somaliland iyo Soomaaliya ay yihiin mideynta Soomaaliya iyo
Somaliland, wuxuuna maamulka Siilaanyo ugu baaqay inay warkaasi ka
daba tagto, wuxuuna yiri “Sheekh Shariif wuxuu si cad ugu faafiyey
dunida in wadahadaladii dhexmaray Soomaaliya iyo Somaliland in
nuxurkoodu ahaa in dib loo mideeyo labada dhinac, arrintan oo ka
horimaneysa warkii aynu ka helnay Madaxdii inooga qeybgashay shirarkii
dhexmaray Soomaaliya iyo Somaliland, kaas oo ay noogu sheegeen in
nuxurkiisu ahaa sidii loo noqon lahaa laba dal oo kala madaxbanaan”.
“Arintan oo khatar ku ah geedi socodkii Somaliland ku raadineysay
ictiraafka muddo ka badan labaatan sano, waxay keeni kartaa in
caalamku rumeysto warka uu fidinayo Sheekh Shariif oo loo qaato in
aynu dib isugu dhiibayno koonfur iyo hoygii halaagu hore inooga soo
maray. sidaasna ay mugdi ku gasho himiladii ummada reer somaliland
raadineysay” ayuu yiri markale Warancadde oo intaasi ku daray “ Waxaa
cadaan ah inuu waraaqo u kala diray caalamka uu ugu sheegayo inuu ku
guuleystay in uu ku qanciyo Somaliland in marlabaad ay Soomaaliya ka
mid noqdaa, isagoo dhinaca kalana ugu faa-iideysanaya olalihiisa
siyaasadeed ee uu halganka ugu jiro in marlabaad uu ku soo noqdo
kursiga madaxtinimada Soomaaliya”.
“Waxaa u dambeeyey waraaqaha uu caalamka u diray mid dhawaan u diray
Guddoomiyaha Jaamacadda Carabta oo uu uga waramayo guusha uu ka gaaray
wadahadaladii dhexmaray Somaliland iyo Soomaaliya, kuna sheegay
warqaddiisa in guushii midnamada Soomaaliya iyo Somaliland ay irrida
taagantahay, taasi oo keentay in Guddoomiyaha Jaamacadda Carabtu si
lama filaan ah uu ugu dhawaaqo inuu ka degi doono Muqdisha dhawaan, si
uu u soo hambalyeeyo guusha uu Sheekh Shariif uu ka soo hooyey
wadahadaladii dhexmaray Somaliland iyo Soomaaliya oo sida aan filayo u
muuqata wabixin been abuur ah oo Sheekh Shariif ka faafinayo
wadahadaladii dhex maray labada dhinac” ayuu yiri markale Mr. Waran
Cadde.
