|

Qabiilada iyo magacyda maxaabiis siyaabo kala duwan looga dejiyey maamulada Somaliland iyo Puntland

Waxaa shalay iyo doraad siyaabo kala duwan looga dejiyey magaalooyinka Hargeysa iyo Boosaaso maxaabiis burcad badeed ah, kuwaas oo ku xirnaa dalal ka duwan oo caalamka ah, iyadoo maxaabiista loo soo wareejiyey sida la sheegay xabsiyo cusub oo loogu talogalay in lagu hayo kooxaha burcad badeeda oo laga hirgeliyey deegaanada Somaliland iyo Puntland.

 Sida warku sheegayo waxaa shalay markii ugu horeysay lagu wareejiyay maamulka Puntland 5 ka mid ah 40-dhalinyaro Soomaali ah, kuwaas oo xabsiyo ku yaala caalamka ugu xirnaa dembiyo la xiriira burcad badeednimo, kuwaas qurshuhu yahay in Puntland lagu wareejiyo si ay halkaasi ugu dhameystaan xabsiyada lagu xukumay oo u dhexeeya 10 illa 24-sano.

Kooxahan maxaabiista ee Soomaalida ah oo laga soo qaaday Jasiiradda Seychelles ayaa shalay lagu wareejiyey maamulka Puntland, waxaana inta ka dhiman xabsiyada horey loogu xukumay ay ku dhameysandoonaan xabsiyo ku yaala Puntland, iyadoo sidoo kale ay jiraan in 12-kale oo lagu wareejiyey iyana maamulka Somaliland, waxaana la sheegay in maxaabiistan dib loo soo celiyey ka dib markii ay dalbadeen in lagu soo celiyo Soomaaliya.

Xubna shalay lagu wareejiyey maamulka Puntland ayaa magacyadoodu iyo dhalashadoodu waxaa lagu kala sheegay sida tan:- C/laahi Maxamed Xuseen {Darood/Majeerteen}, Salaad Maxamed Diiriye {Hawiye/Habargidir}, Ina Mire Muuse {Daarood/Majerteen/Ciise Maxamuud}, Cabdi Axmed Faarax {Daarood/Mareexaan} iyo C/qaadir Xaashi Cawaale {Hawiye/Habargidir}.

Sidoo kale Maamulka Somaliland ayaa lagu wareejiyay maxaabiis Soomaali ah oo burcad badeenimo ku eedeysan kuwaas oo ay dowladda Jasiirada Seychelles ku xukuntay dalkeeda ka dibna ay ku soowareejisay maamulka Somaliland si ay sanadaha u harsan ugu dhameystaan xabsiyo ku yaalla Somaliland.

Qaramada Midoobay ayaa heshiis kula gashay maamulada Somaliland iyo Puntland inay deegaanada ka dhisaan xabsiyo waa-weynoo lagu hayo kooxaha burcad badeeda soomaalida ee xabsiyada kala duwan adduunka kaga jira kuwaas oo loo qoondeeyay in xabsiyada lagu kala xukumo ay ku dhameystaan gudaha dalka Soomaaliya gaar ahaan mamulada Somaliland iyo Puntland oo loo arkay inay ka xasiloonyihiin Soomaaliya inteeda kale.

Leave a Reply